Stóðu íslenskan togara að meintum ólöglegum veiðum

Norska strandgæslan stóð íslenskan togara að meintum ólöglegum veiðum í norskri lögsögu í fyrradag og færði skipið til hafnar í Hammerfest. Strandgæslan gerði athugasemdir við veiðarfæri togarans en hann hafði hins vegar heimildir til veiða í lögsögunni.

Útgerðin var sektuð um tæpar þrjár milljónir íslenskra króna og skipstjórinn um nokkur hundruð þúsund en að því frágengnu fékk togarinn að halda til veiða á ný. Ekki kemur fram í norskum fjölmiðlum hvaða togara um ræðir en þrír íslenskir togarar eru nú á þorskveiðum í norsku lögsögunni.