Baðst afsökunar á líkamsárás

Tvítugur piltur var handtekinn síðastliðna helgi en hann hafði lent í útistöðum við fólk á skemmtistað og síðan í átökum við dyraverði á staðnum. Pilturinn fékk að gista geymslur lögreglunnar þá nóttina.

Eftir að hann hafði sofið úr sér mundi hann lítið eftir atburðum næturinnar. Engu að síður tók hann fram að hann sæi eftir öllu saman og bað hlutaðeigandi afsökunar á framferði sínu.

Pilturinn með eftirsjána átti þátt í einni af sjö líkamsárásum sem voru tilkynntar til lögreglunnar um helgina. Nokkrir einstaklingar þurftu að leita sér aðhlynningar vegna ofbeldisseggjanna. Fimm af árásunum sjö áttu sér stað í miðbænum.