Óþol meðal almennra þingmanna

Einar Mar Þórðarson stjórnmálafræðingur segir ómögulegt að segja til um hvort ályktun samfylkingarmanna í Reykjavík þýði að stjórnarslit verði strax á morgun. „En maður heyrir það innan beggja flokka að það er komið óþol á meðal hins almenna þingmanns," segir Einar Mar. Hann segir að krafan um breytingar sé orðin mjög hávær innan flokkanna, hvort sem um sé rætt breytingar í stjórn Seðlabankans eða Fjármálaeftirlitinu.

Fréttastofa ræddi við Einar Mar þar sem hann var að fylgjast með mótmælunum. Hann sagðist hafa fylgst með frá því að mótmælin hófust í gær og miklar framfarir hafi orðið á þeim. Greinilegt væri af mótmælunum í dag að bæði lögregla og mótmælendur hefðu lært af gærdeginum. „Þannig að það er greinilegt að okkur Íslendingum fer fram í að mótmæla," segir Einar Mar.