OR vildi að hæfi Silju Báru yrði kannað sérstaklega

Orkuveita Reykjavíkur krafðist þess að hæfi Silju Báru Ómarsdóttur, til að sitja í nefnd um erlendar fjárfestingar yrði kannað sérstaklega. Nefndin rannsakar fjárfestingu kanadíska félagsins Magma Energy, í íslenskum orkuiðnaði, en nefndin hefur ráðherravald.

Nefnd um erlendar fjárfestingar hefur rannsakað kaup kanadíska félagsins Magma Energy á hlutum í HS orku, orkufyrirtæki Reyknesinga. Magma kaupir meðal annars hluti í HS orku af Orkuveitu Reykjavíkur, í gegnum sænskt félag sem stofnað var í sumar. Lagastofnun háskóla íslands telur þetta vera á gráu svæði, þar sem lögin sem nefndin á að fylgja eftir, segja að enginn nema íslendingar og aðilar á evrópska efnahagssvæðinu megi eiga í orkufyrirtæki hér.

Nefnd um erlendar fjárfestingar var kosin á Alþingi í sumar og skipti síðar með sér verkum. Þetta er merkileg nefnd og hefur hún í raun ráðherravald, þar sem efnahags- og viðskiptaráðherra ber að fara að því sem nefndin ákveður.

Fjórtánda september, áður en nefndin skipti með sér verkum, sendi Silja Bára Ómarsdóttir, fulltrúi Vinstri-grænna í nefndinni, fréttatilkynningu í nafni nefnarinnar. Þar er sagt frá nefndinni í fáum orðum, skipun hennar og hlutverki hennar. Þá segir í tilkynningunni:

Nefndin hefur fengið spurningar um það hvort Magma Energy Sweden AB, sem virðist uppfylla skilyrði laganna að forminu til, uppfylli efnisleg skilyrði laganna. Nefndin eigi eftir að fjalla um þetta og telji að skoða þurfi aðkomu erlendra aðila að fjárfetngum hér í nýju ljósi, vegna þeirra aðstæðna sem nú séu upp í íslensku samfélagi.

Hjörleifur Kvaran, forstjóri Orkuveitunnar kvartaði til viðskiptaráðherra tveimur dögum síðar og vildi meðal annars að tekin yrði afstaða til þess hvort Silja Bára teldist vera hæf, í ljósi framgöngu hennar; vitnar Hjörleifur þar til fréttatilkynningarinnar. Einnig benti Hjörleifur á að óskýrt væri hver tjáði sig í nafni nefndarinnar.

Nefndinni sjálfri var síðan falið að svara erindinu. Unnur Kristjánsdóttir, nefndarformaður, sagði í bréfi til Hjörleifs, í lok október, að ummæli Silju hefðu verið óheppileg, en valdi þó ekki vanhæfi hennar til að fjalla um fjárfestingu Magma Energy Sweden, í HS orku.