Ásdís Halla íhugar forystuframboð í Reykjavík

Ásdís Halla Bragadóttir, fyrrum bæjarstjóri í Garðabæ, íhugar framboð í prófkjöri Sjálfstæðisflokksins í Reykjavík fyrir komandi þingkosningar. Samkvæmt heimildum Vísis stefnir hún á að leiða lista í öðru Reykjavíkurkjördæmanna.

Stjórn fulltrúaráðs flokksins í Reykjavík hefur lagt til að fram fari prófkjör vegna framboðs til Alþingiskosninganna og verður tekin endanleg ákvörðun um það á fundi fulltrúaráðsins þann 7. febrúar. Ljóst er að mikil endurnýjun verður í forystu flokksins í Reykjavík þar sem Geir Haarde og Björn Bjarnason hafa báðir ákveðið að draga sig í hlé.

Samkvæmt heimildum Vísis hafa félagar Ásdísar Höllu hvatt hana til að láta til sín taka í stjórnmálum á nýjan leik, enda búist við endurnýjun í þingmannahópi og forystu Sjálfstæðisflokksins. Hefur verið skorað á hana að sækjast eftir 1. eða 2. sæti í Reykjavíkurprófkjöri, en þar sem kjördæmin eru tvö í Reykjavík eru þau sæti bæði forystusæti, annað í Reykjavík norður og hitt í Reykjavík suður.

Heimildir Vísis herma að Ásdís Halla sé að íhuga slíkt framboð alvarlega. Ásdís hefur víðtæka reynslu úr atvinnulífinu sem og af opinberum vettvangi, en hún var bæjarstjóri í Garðabæ um árabil og forstjóri BYKO og rekur nú eigið fyrirtæki. Ásdís lauk B.A. gráðu í stjórnmálafræði frá HÍ, er með meistaragráðu í opinberri stjórnsýslu frá Harvard háskóla og er með MBA gráðu frá Háskólanum í Reykjavík