Pinewood brýtur blað

Breska kvikmyndaverið Pinewood hyggst brjóta blað í sögunni með 200 milljóna punda framkvæmdum sínum í Buckinghamskíri. Pinewood hefur sótt um byggingarleyfi fyrir nýju kvikmyndaveri og breski kvikmyndaheimurinn heldur niðri í sér andanum.

Hugmyndir forsvarsmanna Pinewood um nýtt kvikmyndaver þykja byltingarkenndar því innan veggja þess eiga kvikmyndaleikstjórar að geta komist í tæri við götumyndir frá París, New York og Feneyjum. Þá eiga þeir að geta fangað andrúmsloft hins sögulega franska hverfis í New Orleans og úthverfanna í Chicago, svo eitthvað sé nefnt. Einnig er gert ráð fyrir skólum, kirkju og íþróttavöllum í kvikmyndaverinu.

Samkvæmt teikningum er ráðgert að kvikmyndaverið hafi yfir að ráða 100 ekrum af landi. Forsvarsmenn Pinewood hafa þegar sótt um leyfi fyrir framkvæmdunum til sveitarstjórnar Buckinghamskíris og eru vongóðir um að þessi draumur geti orðið að veruleika. Þessar framkvæmdir verða þó ekki ókeypis. Talið er að kostnaðurinn nemi 200 milljónum punda eða rúmum fjörutíu milljörðum íslenskra króna.

Í yfirlýsingu frá Pinewood segir að hugsunin sé sú að bjóða kvikmyndagerðarmönnum upp á hagstæða lausn og að taka þátt í umhverfisvæðingu kvikmyndalistarinnar.

„Framleiðendur geta með þessu kvikmyndaveri minnkað kostnað til muna og komið í veg fyrir löng og dýr ferðalög í flugvélum sem hafa mengandi áhrif á umhverfið," segir í tilkynningu frá Pine­wood. Ef marka má aðstæður í kvikmyndaheiminum um þessar mundir, þar sem alþjóðlega lausafjárkreppan hefur stungið sér rækilega niður, má reikna með að kvikmyndagerðarmenn taki þessum hugmyndum Pinewood fagnandi.

Pinewood-kvikmyndaverið er þekktast fyrir að vera heimili hinna Bond-kvikmyndanna og Carry On-bálksins. Nýlegar myndir sem hafa verið gerðar hjá kvikmyndaverinu má nefna síðustu Bond-mynd, Quantum of Solace, og Dark Knight, síðustu kvikmyndina um Leðurblökumanninn.

Þess má til gamans geta að Hollywood-stórmyndin Prince of Persia: Sand of Time var að stórum hluta tekin upp í Pinewood-kvikmyndaverinu í London en eins og flestir kvikmyndaáhugamenn ættu að vita leikur Gísli Örn Garðarsson stórt hlutverk í henni.

freyrgigja@frettabladid.is