Skriflegt samkomulag um Icesave í október

Steingrímur J. Sigfússon flutti munnlega skýrslu varðandi Icesave-samningana á Alþingi fyrir stundu. Þar fór hann yfir aðdraganda Icesave reikninganna og sagði vandasamt að finna upphafspunktinn í því máli.

Í máli Steingríms kom fram að þegar samninganefndin tók við málinu í febrúar hefði verið búð að semja um allar meginniðrustöður samkomulagsins. Hann sagði samninganefndina hafa bjargað málunum fyrir horn frá því sem fyrri ríkisstjórn hefði lagt upp með.

Steingrímur sagði að í október árið 2008 hefðu íslendingar samþykkt í aðalatriðum ábyrgð á þessum reikningum. „11.október kom fréttatilkynning um samkomulag Íslands og Hollands. Þar sagði að loknum uppbyggilegum viðræðum hefði náðst lausn mála á Icesave og fjármálaráðherra Hollands fagnaði niðurstöðu í málinu. Árni M. Mathiesen bætti því við að málið væri nú leyst sem væri aðalatriðið."

Steingrímur sagði að ekki hefði hinsvsegar komið fram að þarna hefði verið um skriflegt samkomulag að ræða sem hefði verið undirritað af æðstu embættismönnum þjóðarinnar.

Hann sagði að staðan í febrúar þegar samninganefndin hefði tekið við hefði verið sú að búið væri að ganga frá öllum helstu aðalatriðum með skriflegum hætti þar tilbærra stjórnvalda.

„Auðvitað geta menn hlaupið frá öllu en það breytir ekki skjalfestum gögnum og þau munu koma fram í dagsljósið.," sagði Steingrímur og bætti því við að nú þegar hann hefði öll gögn í höndunum sæi hann að tekist hefði verið að lagfæra til mikilla muna þá niðurstöðu sem í stefndi og þeir sem hefðu gert það ættu þakkir skilið.

Hann sagð margt eiga eftir að koma í ljós í þessu máli sem hann hafi sleppt að minnast á en hann spáði því að margt af því ætti eftir að komast á spjöld sögunnar.