Jóhanna segist tilbúin að taka við

„Ég á eftir að sjá hvernig málin leggjast og hvort ég hafi ekki örugglega traust í þetta," segir Jóhanna Sigurðardóttir, en í gær sagði Ingibjörg Sólrún að Samfylkingin legði áherslu á að hún yrði forsætisráðherra. Spurð hvort hún sjálf væri tilbúin til að taka það að sér svaraði hún; „Já, já."

Jóhanna segir að hugmyndin hafi fyrst verið nefnd við hana í gærmorgun. Hennar fyrsti kostur í nýju stjórnarsamstarfi er minnihlutastjórn með Vinstri grænum og stuðningi Framsóknarflokks. „Síðan kemur auðvitað til greina minnihlutastjórn okkar í Samfylkingunni með hlutleysi vinstri grænna og framsóknarmanna," segir hún.

Spurð hvort hún hafi eitthvað rætt við þingmenn Vinstri grænna svaraði hún: „Ég er alltaf að tala við vinstri græna." - ss