„Við höfum tekið við keflinu“

„Við höfum tekið við keflinu frá forseta Íslands og setjumst yfir það verkefni að útbúa öfluga ríkisstjórn," sagði Ingibjörg Sólrún Gísladóttir, formaður Samfylkingarinnar þegar Ólafur Ragnar Grímsson hafði falið þeim að hefja viðræður um myndun minnihlutastjórnar með stuðningi Framsóknarflokksins og mögulegri aðkomu Frjálslynda flokksins. Ingibjörg sagðist vonast til að slík ríkisstjórn yrði starfhæf fyrir helgi. „Þetta er verkefni sem við munum nú setjast yfir," sagði Ingibjörg.

„Okkur hefur verið falið þetta verk og við göngum í það og brettum upp ermar," sagði Steingrímur J. Sigfússon, formaður Vinsti grænna. Hann sagði mikilvægt að óvissunni í þjóðfélaginu yrði að eyða. „Við gerum okkar besta við erfiðar aðstæður og niðurstða af eða á þarf að liggja fyrir sem fyrst."

Forsetinn sagðist aðspurður ekki hafa gert Geir H. Haarde grein fyrir þessari ákvörðun sinni enda væri það ekki venjan. Hann sagðist einnig hafa komist að því í viðræðum sem hann átti við formenn flokkanna í gær að hugmyndin um þjóðstjórn væri ekki góð. „Það yrði að mínum dómi þóf að hefja slíkar viðræður." Hann benti þó á að ef tækist að mynda minnihlutastjórn með stuðningi allra flokka á Alþingi að Sjálfstæðisflokki undanskildum hefði sú stjórn breiða skýrskotun út í þjóðfélagið.