Veit ekki hverjir eiga jöklabréfin

Þór Saari þingmaður Borgarahreyfingarinnar spurði Steingím J. Sigfússon fjármálaráðherra hvenær yrði upplýst hverjir raunverulegir eigendur hinna svokölluðu jöklabréfa væru á Alþingi fyrir stundu. Talaði hann um sterkan orðróm sem hefði verið uppi um að innlendir fjárfestar og fjármálastofnanir væru hinir raunverulegu eigendur bréfanna. Steingrímur sagði þann orðróm ekki réttan.

„Samkvæmt mínum upplýsingum sem ég byggi aðallega á samtölum mínum við Seðlabankann þá er það í mjög óverulegum mæli og sá orðrómur er því ekki réttur," sagði Steingrímur um orðróminn sem Þór talaði um.

Steingrímur sagðist ekki hafa upplýsingar undir höndum hverjir eigi umrædd jöklabréf í augnablikinu. Vísaði hann á Seðlabankann sem myndi þá upplýsa um það á viðskiptalegum forsendum.

Steingrímur, svaraði einnig Sigmundi Davíð Gunnlaugssyni formanni Framsóknarflokksins og sagði hann vel koma til greina að þingnefndir fái upplýsingar um stöðu bankanna nú þegar skýrslur endurskoðunarfyrirtækjanna Delautte og Weimann liggja fyrir.

Sigmundur vildi vita hvers vegna almenningur fengi ekki að vita um innihald skýrslunnar.

Steingrímur sagði að málið væri í þeim farvegi að samningaviðræður standi nú yfir á milli kröfuhafa og skilanefnda, nýju bankanna og ráðgjafa stjórnvalda.

Um mikla hagsmuni væri að tefla og að mestu máli skipti að ná samkomulagi um farsæla lausn á þeim málum fyrir alla aðila og ekki síst ríkið.

Ráðgjafar ríkisstjórnarinnar mæltu með því í upphafi að sögn Steingríms að trúnaðar væri gætt í þessari vinnu og því væri ekki hægt að upplýsa að svo stöddu um innihald skýrslanna. Hins vegar væri hægt að skoða það að veita þingnefndum ákveðnar upplýsingar.

Nú stendur yfir fyrispurnartími með óundirbúnar fyrirspurnir á Alþingi.