Eyþór íhugar þingframboð

Eyþór Arnalds, oddviti sjálfstæðismanna í Árborg, íhugar að gefa kost á sér á framboðslista Sjálfstæðisflokksins í Suðurkjördæmi fyrir kosningarnar í apríl. Eyþór segir að hann taki ákvörðun á næstu dögum. „Það hefur ekki verið rætt um ákveðið sæti en í rauninni er allt opið." Eyþór bendir þó á að kjördæmisráð flokksins hafi ekki ákveðið hvaða leið verði farin við val á framboðslista flokksins.

Árni Mathiesen fór fyrir Sjálfstæðisflokknum í kjördæminu í þingkosningunum fyrir tveimur árum. Hann hefur líst því yfir að hann sækist eftir endurkjöri til Alþingis. Annar Árni hefur verið orðaður við oddvitasætið í kjördæminu en sá er Sigfússon og er bæjarstjóri í Reykjanesbæ. Þá er óvíst hvað Árni Johnsen gerir en hann skipaði annað sæti á lista flokksins 2007.

Rík krafa um endurnýjun

Eyþór segir að meðal sjálfstæðismanna líkt og víða í samfélaginu sé rík krafa um endurnýjun og fjölbreyttara mannval á Alþingi „Í því samhengi líta margir til sveitarstjórnarmanna og þá er ekki óeðlilegt að fólk horfi til þeirra sem leiða lista í stærstu bæjarfélögunum í kjördæminu."

Sjálfstæðisflokkurinn 2.0

Sjálfstæðismenn kjósa sér nýjan formann á landsfundi flokksins í mars. Mögulega verður þar kjörin ný forystusveit, að mati Eyþórs. „Þannig að það er ekki ólíklegt að það verði umtalsverð kynslóðaskipti. Sjálfstæðisflokkurinn 2.0."

Bæjarfulltrúi síðan 2006

Eyþór sigraði prófkjör Sjálfstæðisflokksins í Árborg fyrir bæjarstjórnarkosningarnar 2006. Hann sóttist eftir forystusæti á framboðslista sjálfstæðismanna í borgarstjórnarkosningunum 2002 en dró sig til baka í þeirru fullvissu að Björn Bjarnason gæfi kosti á sér sem oddviti. Eyþór starfar nú sem framkvæmdastjóri Strokks Energy ehf.