Stálu 20 kartonum af Winston sígarettum

Brotist var inn í Aðalsjoppuna við Tjarnargötu í Vogunum um kl. 01:00 aðfararnótt mánudags. Þaðan var stolið um 20 kartonum af Winston sígarettum. Í öryggismyndavél Aðalsjoppunar sást til tveggja ungra manna við verknaðinn.

Þetta kemur fram í frétt frá lögreglunni á Suðurnesjum. Þar segir að báðir mennirnir hafi verið klæddir í dökkar hettupeysur, önnur með áberandi netamynstri. Báðir í bláum gallabuxum og annar í hvítum strigaskóm.

Er þeirra nú leitað og biður lögreglan alla sem gætu gefið upplýsingar um málið að hafa samband við lögregluna á Suðurnesjum.

Þá er sagt frá því að rétt fyrir kl. 17:00 í dag hafi orðið harður árekstur á Njarðarbraut á móts við ÓB.

Þar missti ökumaður stjórn á bifreið sinni með þeim afleiðingum að hún lenti framan á bifreið, sem kom úr gagnstæðri átt.

Ökumenn og tveir farþegar voru fluttir með sjúkrabifreið á Heilbrigðisstofnun Suðurnesja til skoðunar. Bifreiðarnar voru fjarlægðar af vettvangi með kranabifreið.