Landsfundi Samfylkingar flýtt

Landsfundi Samfylkingarinnar verður að öllum líkindum flýtt og haldinn í mars eða apríl. Ráðgert var að halda fundinn næstkomandi haust.

Sjálfstæðisflokkurinn hugðist halda landsfund sinn um næstu helgi en nú lítur allt út fyrir að kosið verði til Alþingis 9. maí. Miðstjórn flokksins ákvað í gærdag að fresta fundinum fram til 26. til 29 mars. Þá var ákveðið á stjórnarfundi Vinstri grænna í gær að boða til landsfundar þriðju helgina í mars.

Samkvæmt heimildum hugnast forystu Samfylkingarinnar illa að halda landsfund flokksins á sama tíma og Sjálfstæðisflokkurinn. Þrjár tímasetningar eru til skoðunar, 20. til 22. mars, 17. til 19. apríl eða 24. til 26. apríl. Pálmasunnudagur og páskarnir bera upp í ár fyrstu og aðra helgina í apríl.

Forystan telur óheppilegt að landsfundur flokksins fari fram nokkrum dögum fyrir kjördag og því er talið líklegast að fundurinn verði haldinn helgina 20. til 22. mars.

Samkvæmt lögum flokksins þarf að boða landsfund bréflega með minnst sex vikna fyrirvara. Þó er heimilt að boða til aukalandsfundar með skemmri fyrirvara, ef sérstakar og óvenjulegar aðstæður eru fyrir hendi. Aftur á móti er þá óheimilt að láta fara fram kosningar til æðstu stjórna eða afgreiða lagabreytingar.