Siðferðisbrestur Guðjóns - hættir á þingi fyrir Frjálslynda

„Þegar menn búa við heimilisböl til lengri tíma þá endar það með því að þeir segja hingað og ekki lengra," segir Jón Magnússon, þingflokksformaður Frjálslynda flokksins, sem hefur ákveðið gefa ekki kost á sér fyrir flokkinn í komandi þingkosningum. Jón segir Guðjón Arnar Kristjánsson, formann flokksins, hafa sýnt alvarlegan siðferðisbrest.

„Miðað við þær aðstæður sem eru í flokknum óska ég ekki eftir því að vera í framboði fyrir hann." Deilur, ósætti og sú staðreynt að flokkurinn geti ekki talað skýrt í mikilvægum málum er ástæðan á bak við ákvörðun Jóns. Hann ákvað á seinasta ári að hann ætlaði ekki að sækjast eftir endurkjöri fyrir flokkinn.

Störf Jóns gerð tortryggileg

Jón segist hafa viljað sjá ákveðnar breytingar gerðar á starfi flokksins og að hann hafi verið mikill áhugamaður um uppbyggingu flokksins og nýliðun. Þessi mál hafi hann rætt við Guðjón Arnar. Jón segir að síðar hafi hann orðið þess var að ákveðnir einstaklingar hafi reynt að gera störf hans tortryggileg og jafnvel skemma fyrir uppbyggingu flokksins.

Jón segir að meðal þeirra sem hafi haldið uppi andstöðu við sig og rætnum nafnlausum skrifum á netinu hafi verið Helgi Helgason, fyrrverandi starfsmaður flokksins. „Ég gerði á sínum tíma kröfu um að Helgi viki en formaðurinn sá ekki ástæðu til þess. Mér finnst það vera alvarlegur siðferðisbrestur."

Blendnar tilfinningar - útilokar ekki þingframboð



Jón settist á þing fyrir Frjálslynda flokkinn í maí 2007. Í september á seinasta ári var hann kjörinn þingflokksformaður Frjálslynda flokksins. Áður var Jón varaþingmaður Sjálfstæðisflokksins á árunum 1983 til 1987. Hann var formaður Sambands ungra sjálfstæðismanna 1977 til 1981.