Steingrímur og Jóhanna funda

Jóhanna Sigurðardóttir forsætisráðherraefni væntanlegrar ríkisstjórnar og Steingrímur J. Sigfússon formaður Vinstri grænna komu saman til fundar upp úr klukkan níu í morgun, til að ræða stöðuna í stjórnarmyndunarviðræðum flokkanna.

Þingflokkur Framsóknarflokksins tók sér frest í gær til að fara betur yfir stjórnarsáttmála Samfylkingar og Vinstri grænna og reiknað er með að framsóknarmenn skili jafnvel frá sér tillögum um nánari útfærslur á stjórnarsáttmálanum síðar í dag.

Stjórnarmyndunarviðræðum Samfylkingar og Vinstri grænna er í raun lokið og nú er beðið eftir framsóknarmönnum. Flokkarnir hafa komið sér saman um skipan í ráðherraembætti, en eitt embætti er þó óklárt og gæti þar jafnvel verið um aðkomu Framsóknarmanna að ræða. Þá er líklegast að kjördagur verði 25. apríl.

Þegar framsóknarmenn hafa að lokum sæst á aðgerðaráætlun væntanlegrar ríkisstjórnar, þarf samfylkingarfólk að halda flokksstjórnarfund til að kynna niðurstöðuna en Vinstri grænum dugar að boða þingflokksfund. Eins og Vísir sagði frá fyrr í morgun hefur flokksstjórnarfundi Samfylkingar sem halda átti klukkan 11:00 í morgun verið frestað um óákveðin tíma.

Leiðtogar Samfylkingarinnar og Vinstri grænna leggja áherslu á að ljúka málum um helgina og þá helst í dag, vegna þess tímaramma sem Ólafur Ragnar Grímsson setti viðræðunum. Eins munu leiðtogarnir helst vilja að Geir H. Haarde geti setið síðasta ríkisráðsfund fráfarandi stjórnar á Bessastöðum, áður en hann heldur utan á morgun til læknismeðferðar vegna veikinda sinna.

Enn telja menn möguleika á að hægt verði að mynda nýja ríkisstjórn í dag, og munu línur í þeim efnum sennilega skýrast um hádegisbil.