Segist ekki hafa beitt klækjastjórnmálum

Skúli Helgason framkvæmdarstjóri Samfylkingarinnar hafnar því að hafa beitt klækjastjórnmálum í gær líkt og Sigmundur Davíð Gunnlaugsson formaður Framsóknarflokksins gaf í skyn fyrr í dag. Þá sagði Sigmundur að aðra en Jóhönnu Sigurðardóttur og Steingrím J. Sigfússon hafa farið fram úr sér þegar kynna átti opinberlega tillögur væntanlegrar ríkisstjórnar.

„Þetta er ekki einhver atburðarrás sem ég teiknaði upp. Við gerum ekkert nema fá um það tilmæli frá okkar forystumönnum sem byggja á samtölum þeirra við forystumenn annarra flokka," segir Skúli í samtali við Vísi.

Skúli segir Samfylkinguna hafa unnið þetta mál í gær af fullum heilindum og enginn hafi reiknað með þessum viðbrögðum frá Framsóknarflokknum.

„Það er líka rangt að hann [Sigmundur] hafi verið að sjá þessa pappíra í fyrsta sinn í gær. Hann var búinn að sjá þá nokkrum sólarhringum áður en ég veit ekkert hvernig samskipti hans við þingflokkinn voru."