Átak í atvinnumálum hefur skilað yfir 2200 störfum

Iðnaðarráðuneytið hefur lokið fyrstu samantekt á árangri sérstaks átaks ríkisstjórnarinnar í atvinnumálum sem miðað að því að draga úr atvinnuleysi með sköpun allt að 6000 ársverka á næstu misserum. Þótt ekki séu komnar tæmandi upplýsingar um alla þætti aðgerðanna er niðurstaðan samt sem áður sú að nú þegar má rekja um 2200 til 2500 störf til átaksins, að fram kemur í tilkynningu.

Þar segir að stærsti einstaki liðurinn í verkefninu er í byggingariðnaði þar sem margt bendir til að fleiri störf verði til en þau 1700 sem reiknað var með í upphafi. Rýmkun á lánum til viðhalds félagslegra íbúða rýmkaðar hefur skilað samningum upp á um 300 ársverk á þessu ári og næsta. Þá hafi hröðun útboða á leiguhúsnæði fyrir stofnanir ríkisins skilað verkefnum upp á 274 ársverk. Í báðum tilfellum séu enn fleiri verkefni í farvatninu. Þá eru um 300 störf við byggingu tónlistar- og ráðstefnuhúss.

„Sá liður sem kemur kannski mest á óvart er árangur af hækkuðu endurgreiðsluhlutfalli virðisaukaskatts vegna kvikmyndaverkefna hér á landi. Samantekt frá íslensku framleiðslufyrirtækjunum leiðir í ljós að 500 störf tengjast kvikmyndagerð hér á landi," segir í tilkynningunni.