Poppað í Garðabæ

Skólahljómsveit Kópavogs heldur sína árlegu hausttónleika á morgun kl. 20 í sal Fjölbrautaskólans í Garðabæ. Fram koma um 130 ungir hljóðfæraleikarar sem skipt er í þrjár hljómsveitir eftir aldri og getu, enda er Skólahljómsveit Kópavogs ein fjölmennasta ungmennahljómsveit landsins.

Þema tónleikanna verður popp- og danstónlist, en það er sjálfsagt ekki á hverjum degi sem íslenskar blásarasveitir taka heila tónleika undir poppmúsík. Lögin sem flutt verða koma úr ýmsum áttum, bæði innlend og erlend, nýleg og gömul. Michael Jackson verður að sjálfsögðu heiðraður með nokkrum af hans þekktustu smellum, lög úr smiðju Coldplay og Earth, Wind & Fire verða í stóru hlutverki og íslensk lög á borð við Þú komst við hjartað í mér, Jungle Drum og Eurovision-lagið Is It True? munu hljóma í flutningi unga fólksins. Margar útsetninganna eru nýjar af nálinni og sumar þeirra hafa aldrei verið fluttar áður á tónleikum.

Hefð er fyrir því hjá Skólahljómsveit Kópavogs að vinna út frá ákveðnu þema að hausti og halda uppskerutónleika með efninu í byrjun nóvember. Þá koma sveitirnar þrjár fram og sýna hverju þær hafa unnið að fyrri part vetrar. Tvær eldri sveitirnar hafa farið í æfingabúðir yfir helgi til að ná sem bestum tökum á poppinu og verður spennandi að sjá afraksturinn á tónleikunum.

Þótt Skólahljómsveit Kópavogs sé orðin rúmlega fjörutíu ára gömul sýnir hún engin ellimerki og tekur popp- og danslögin sterkum tökum. Endurnýjun hljómsveitanna er líka jöfn og góð og á hverju ári sækir stór hópur barna um að komast að hjá hljómsveitinni, en hljóðfæraleikarar eru á aldrinum níu til sautján ára.

Aðgangur að tónleikunum er öllum opinn og miðaverði vel í hóf stillt. Stjórnandi Skólahljómsveitar Kópavogs er Össur Geirsson. - pbb