Lögum verði breytt um Seðlabankann

Ögmundur Jónasson heilbrigðisráðherra efast um að Seðlabanki Íslands eigi að vera sjálfstæð stofnun áfram.

Hann segir í helgarviðtali við Fréttablaðið að bankinn ætti að hafa hagsmuni alls samfélagsins undir.

„Ef bankinn rís ekki undir því að axla samfélagslega ábyrgð sína, hvers vegna er hann þá ekki færður aftur undir lýðræðislegt ákvörðunarvald?" spyr hann. Sjálfstæði Seðlabankans segir Ögmundur hluta af peningahyggju liðinna áratuga.

„Þessi tími er á enda runninn. Auðvitað á Seðlabankinn, eins og allar aðrar stofnanir í lýðræðissamfélagi, að vera háður þeim sem huga að almannahag."

Um hvort til standi að breyta lögum um bankann á kjörtímabilinu, segir Ögmundur: „Ég held að þegar við tölum um þetta kjörtímabil, eigum við aldrei að segja aldrei um neitt. Allt hlýtur að vera í stöðugri endurskoðun, lög um Seðlabankann líka. Ef hann er farinn að ganga gegn þjóðarhag, þá hljótum við að taka hans starfsemi til endurskoðunar. Það er sem betur fer ekki bannað með lögum að breyta lögum."

Spurður hvernig eigi að skapa stöðugleika í efnahagsmálum utan ESB, og þá sérstaklega í gjaldmiðlamálum, segir hann að þetta þurfi að íhuga vel.

„Ég hef ekki komist að niðurstöðu í því. En ég vil að við skoðum alla kosti."

Gagnrýni á ríkisstjórnina, um skort á gagnsæi og fleira, eigi að taka alvarlega.

Stjórnin sé þó rétt að byrja.

„Það er heilmikill tími til stefnu því við ætlum að sitja hérna næstu tólf árin."- kóþ /