Ferguson býst ekki við Liverpool keppi við United um titilinn

Sir Alex Ferguson, stjóri Manchester United, er ekki á því að sala Liverpool á Xabi Alonso til Real Madrid hafi mikil áhrif á Liverpool-liðið en hann er enga að síður búinn að afskrifa titilvonir erkifjendanna úr Bítlaborginni.

„Liverpool átti líklega sitt besta tímabil í 20 ár, náði í 86 stig en liðið varð samt fjórum stigum á eftir okkur. Það verður mjög erfitt fyrir Liverpool að jafna árangur sinn á síðasta tímabili og hvað þá að bæta hann," sagði Sir Alex Ferguson.

„Önnur lið í deildinni munu líka vera farin að lesa leik Liverpool miklu betur á þessu tímabíl," sagði Sir Alex. Ferguson segir missinn í Xabi Alonso ekki hafa það mikil áhrif því leikur Liverpool-liðsins standi og falli algjörlega með þeim Steven Gerrard og Fernando Torres.

Ferguson hefur miklu meiri áhyggjur af Chelsea. „Chelsea verður aðalkeppninautur okkar í vetur. Ancelotti mun breyta leikstíl liðsins, liðið hefur mikla breidd og hann mun fá nóg af mörkum frá þeim Didier Drogba og Nicolas Anelka," sagði Ferguson sem var ekki hættur skotunum á Liverpool.

„Chelsea munu spila eins og AC Milan. Það færði Ancelotti tvo Evróputitla og þeir hefðu átt að vera þrír þar sem AC Milan átti aldrei að tapa fyrir Liverpool í úrslitaleiknum 2005," sagði Ferguson.