Embættismenn funduðu með Robert Wade

Robert Wade, stjórnmálahagfræðingur við London School of Economics fundaði í morgun með fulltrúum frá fjármála-, forsætis- og viðskiptráðuneytinu. Fundurinn stóð yfir í nærri tvær klukkustundir.

Robert Wade var frummælandi á Borgararfundinum í Háskólabíói á mánudaginn.

Wade gagnrýndi meðal annars íslensk stjórnvöld harðlega fyrir aðgerðarleysi í aðdraganda bankahrunsins. Hann sagði fráleitt að halda því fram að Ísland væri einungis saklaust fórnarlamb alþjóðlegu lánsfjárkreppunnar heldur væri bankahrunið meira og minna afleiðing heimatilbúins vanda.

Stjórnsýslan og eftirlitsstofnanir hefðu brugðist með afgerandi hætti.

Í grein sem birtist í breska blaðinu Financial Times síðastliðið sumar varar Wade við yfirvofandi bankahruni á Íslandi.

Í ræðu sinni í Háskólabíói boðaði Wade frekari áföll á hinum alþjóðlega fjármálamarkaði. Hann sagði að íslensk stjórnvöld hefðu nú aðeins nokkrar vikur til að fara í nauðsynlegar aðgerðir. Meðal annars þurfi að bregðast við auknu atvinnuleysi og styrkja lífeyrissjóðina.

Fundur Wade með embættismönnum hófst klukkan ellefu en honum lauk um klukkan eitt.

Jón Þór Sturluson, aðstoðarmaður viðskiptaráðherra, sat fundinn fyrir hönd viðskiptaráðuneytisins. Hann segir margt í fullyrðingum Wades gefa til kynna að hann hafi ekki fulla yfirsýn yfir ástandið hér á landi.

"Þetta var bara fundur til að skiptast á skoðunum. Wade hefur tjáð sig um aðstæður hér á landi. Stór hluti fundarins fór í að skýra fyrir honum hvað væri í gangi og tala um skipulag á aðgerðum stjórnvalda. Hann var mjög spurull um það. Við gerðum athugasemdir við nokkur atriði sem hann hefur nefnt opinberlega, t.d. eins og hann lýsir fjármálaeftirlitinu," sagði Jón Þór.