Mótmælendur flytja sig yfir í Stjórnarráðið vegna jarðarfarar

Mótmælendur láta ekki deigan síga og eru mættir á ný á Austurvöll til þess að mótmæla ástandinu og ríkisstjórninni. Um þúsund manns eru á svæðinu og berja þeir í potta og pönnur og þeyta flautur með tilheyrandi hávaða. Þeir hafa hins vegar ákveðið að færa sig um set um stundarsakir og taka upp mótmælastöðu við Stjórnarráðið. Ástæða þess er sú að jarðarför fer nú fram við Dómkirkjuna.

Þingfundi sem halda átti í dag var aflýst og nú fundar Sturla Böðvarsson með formönnum þeirra stjórnmálaflokka sem sæti eiga á Alþingi. Gera má ráð fyrir því að fundað sé um framhald þingstarfa en næsti þingfundur hefur verið boðaður á morgun klukkan hálfellefu.