Stuðningur Framsóknar ekki skilyrðislaus

Stuðningur Framsóknarflokksins við minnihlutastjórn Samfylkingar og VG er ekki hugsaður þannig að menn hafi frítt spil næstu mánuðina, sagði formaður flokksins eftir fund með forseta Íslands í gærkvöld. Formaður Frjálslynda flokksins segir það aumingjadóm ef þingmenn geti ekki tekist á við þau verkefni sem liggja fyrir.

Sigmundur Davíð Gunnlaugsson, formaður Framsóknarflokksins, ítrekaði á fundi sínum með Ólafi Ragnari í gær að flokkurinn muni styðja ríkisstjórn Samfylkingar og Vinstri-grænna. Aðspurður hvort að Framsóknarflokkur fengi embætti forseta Alþingis útilokaði Sigmundur það ekki.

Guðjón A. Kristjánsson, formaður Frjálslynda flokksins, ítrekaði afstöðu flokksins um að þjóðstjórn sé besti kosturinn í stöðunni. Hann telur að þó að tveir flokkar hafi ekki getað unnið saman eigi það ekki að standa í vegi fyrir að mynduð verði þjóðstjórn.