Gagnrýna ákvörðun um aukningu þorskkvóta

Miðstjórn Frjálslynda flokksins harmar þá ákvörðun ríkisstjórnar við aukningu þorskkvótans um 30.000 tonn skuli í ekki farið að áliti Mannréttindanefndar Sameinuðu þjóðanna um að auka jöfnuð í þjóðfélaginu með því að ráðstafa auknum afla um leigumarkað til allra sem gera út á botnfiskveiðar og að leigutekjur renni í ríkissjóð. Þannig yrði opnað fyrir nýliðun í sjávarútvegi og komið til móts við álit Mannréttindanefndar Sameinuðu þjóðanna.

,,Miðstjórn Frjálslynda flokksins telur að aldrei fyrr hafi verið jafn brýnt að stjórnmálamenn gæti þess að þær ákvarðanir sem teknar eru séu teknar á grundvelli sanngirni og með tilliti til hagsmuna allra borgara þjóðfélagsins að leiðarljósi," segir í ályktun miðstjórnar.

Miðstjórnin mótmælir því eindregið að núverandi kvótahöfum skuli færðar allar þessar viðbótarheimildir. ,,Með því er ríkisstjórnin enn að auka ójöfnuð í þjóðfélaginu og sýnir að hún ætlar ekki að nokkru leyti að taka tillit til niðurstöðu Mannréttindanefndar Sameinuðu þjóðanna sem hefur lýst kvótakerfið andstætt mannréttindum."

Sú ríkisstjórn sem nú situr hefur ekki starfað í þeim anda að auka jöfnuð og hefur enn á ný, með því að færa aðeins núverandi kvótahöfum þessa viðbót, rofið grið við þjóðina, að mati miðstjórnar flokksins.