Rúmlega 200 þreyta íslenskupróf til að fá ríkisborgararétt

Alls munu 205 útlendingar þreyta íslenskupróf fyrir umsækjendur um íslenskan ríkisborgararétt sem haldin verða í fyrsta sinn 8. til 12. júní. Umsækjendur um íslenskan ríkisborgararétt verða að hafa staðist próf í íslensku samkvæmt breytingum sem gerðar voru á reglum um íslenskan ríkisborgararétt um áramótin. Próftökugjaldið er 7000 krónur.

Dóms- og kirkjumálaráðuneytið samdi við Námsmatsstofnun um að annast undirbúning og framkvæmd prófanna. Prófið er bæði skriflegt og munnlegt verður haldið tvisvar á ári og verður það haldið næst í nóvember eða desember.

Prófið miðast við lokamarkmið í grunnnámi í íslensku fyrir útlendinga samkvæmt námskrá menntamálaráðuneytisins. Það samsvarar 240 kennslustundum.