Þingið fjalli um tillöguna

Bjarni Benediktsson, formaður Sjálfstæðisflokksins, segir tillögu ríkisstjórnarinnar um aðildarviðræður við Evrópusambandið vera afar ósannfærandi og bera það með sér að lítil sannfæring liggi að baki henni. „Þetta er afar rýrt í roðinu og hvergi í tillögunni, eða greinargerðinni sem henni fylgir, er færður fyrir því rökstuðningur, eða látið að því liggja, að áhugi sé eða vilji fyrir því að ganga í málið hjá ríkisstjórninni. Það er eins og þetta snúist bara um að þjóðin fái færi á að kjósa um málið.“

Bjarni segist ekki hafa rætt við utanríkisráðherra um helgina, en hann hafi tjáð honum fyrir helgi að hann teldi að málið ætti að fá hefðbundna þinglega meðferð. Það færi þá fyrir utanríkismálanefnd og þar væri hægt að gera breytingar­tillögur ef verkast vildi.

Hann segir ótímabært að segja til um hvort og þá hvaða breytingar­tillögur Sjálfstæðisflokkurinn muni gera á tillögunni. Þá sé einnig ótímabært að segja hvort flokkurinn sé reiðubúinn til að taka þátt í viðræðum við sambandið, en ráðherrar hafa talað um að leita eftir samstarfi þar um. Málið sé á forræði ríkisstjórnarinnar.

„Það er einkennilegt að utanríkis­ráðherra tefli fram þingsályktunar­tillögu þar sem hann áskilur sér rétt til að berjast gegn samningnum sem hann síðan klárar. Slíka samninga á ekki að gera.“- kóp