Nýtt lýðveldi kom fyrir hvítum borðum

Hvítum borðum var komið fyrir á ljósastaurum um alla borg í nótt. Hópur sem kallar sig Nýtt lýðveldi stóð fyrir þessu en hóurinn berst fyrir því að ný stjórnarskrá verði skrifuð og að nýtt lýðveldi verði stofnað á grundvelli hennar.

Það eru Njörður P. Njarðvík, Ólína Þorvarðardóttir, Tryggvi Gíslason og Birgir Björgvinsson sem standa á bak við hópinn Nýtt Lýðveldi. Á heimasíðu hópsins er áskorun til Forseta og alþingis um að tímabundin utanþingsstjórn verði skipuð sem fari muni með framkvæmdavald.

Samhliða því vill hópurinn að Alþingi boði til stjórnlagaþings eða þjóðfundar. Hópurinn vill að það verði ný stjórnarskrá skrifuð og í kjölfarið verði nýtt lýðveldi stofnað.

Á meðal þess sem hópurinn leggur til að skrifað verði inn í nýja stjórnarskrá er endurskoðun á kosningareglum til Alþingis og kjördæmaskipan meðal annars með það að markmiði að hægt sé að kjósa einstaklinga en ekki bara flokka og að skerpa á aðgreiningu framkvæmdavalds, löggjafavalds og dómstóla

Rúmlega 2700 manns hafa undirritað áskorun til stuðnings þessum hugmyndum á heimasíðunni nyttlydveldi.is en hafið var að safna undirstkiftum á fimmtudag.