Aðstoðar Steingrím

Jóhann Guðmundsson hefur verið ráðinn aðstoðarmaður Steingríms J. Sigfússonar, sjávarútvegs- og landbúnaðarráðherra og formanns Vinstri grænna.

Jóhann er búfræðingur að mennt frá Bændaskólanum á Hvanneyri (1976) og Búfræðikandidat frá Búvísindadeild Bændaskólans á Hvanneyri (1981). Hann nam landbúnaðarhagfræði við Landbúnaðarháskóla Svíþjóðar í Uppsölum 1982 til 1985. Jóhann var kennari í gagnfræðaskóla Siglufjarðar 1981-1982 og starfaði í landbúnaðarráðuneytinu 1985 til 1995, þar af deildarstjóri frá 1987. Jóhann var fulltrúi landbúnaðarráðuneytisins og samgönguráðuneytisins í Brussel 1995 til 1998 og starfaði sem skrifstofustjóri í samgönguráðuneytinu 1998 til 2009.