Óljóst hvort Borgarahreyfingin lifi út kjörtímabilið

Þingmenn Borgarahreyfingarinnar íhuga enn hvort þeir hyggist starfa áfram fyrir hreyfinguna eftir miklar deilur um lög og framtíð hennar á landsfundi í gær. Stjórnmálafræðingur segir skipulags-og reynsluleysi einkenna flokkinn og ómögulegt sé að segja til um hvort hann lifi út kjörtímabilið.

Mikið hefur gengið á í Borgarahreyfingunni að undanförnu, Þráinn Bertelsson einn fjögurra þingmanna hreyfingarinnar sagði sig úr þingflokknum vegna innbyrðis deilna.

Þá lét framkvæmdastjóri þingflokksins af störfum og formaður stjórnar Borgarhreyfingarinnar sagði skilið við hann. Nú síðast í gær á fyrsta landsfundi Borgarahreyfingarinnar ruku þingmennirnir þrír Birgitta, Þór og Margrét á dyr í fússi því lög voru samþykkt með meirihluta atkvæða sem gengu þvert á vilja þeirra. Þau íhuga nú hvort þau muni halda áfram að starfa fyrir hreyfinguna.

Raunar var andrúmsloftið svo rafmagnað á landsfundinum í gær og það mátti best sjá þegar stjórnarmaður hreyfingarinnar Guðmundur Andri Skúlason og þingkonan Birgitta Jónsdóttir fóru í hár saman fyrir framan myndavélina.

En það má segja að fljótt skipist veður í lofti því það var aldeilis annað hljóð í þeim á kosningavöku Borgarahreyfingarinnar í apríl síðastliðnum. „Við erum algjörlega samstíga. við höfum leyst úr öllum okkar málum," sagði Þór Saari.

„Ég held að þarna hafi komið saman fólk með með ólíkar skoðanir en svipaðir væntingar um breytingar," segir Einar Mar Þórðarson, stjórnmálafræðingur, um vanda hreyfingarinnar.

Einar segir erfitt að segja til um hvort að Borgarahreyfingin lifi af kjörtímabilið. Ljóst sé að þingmennirnir komi til með að sitja út kjörtímabilið. Ómögulegt sé að segja til um hvort að flokkurinn komi til með að lifa af næstu kosningar. Sagan sé ekki hagstæð nýjum flokkum eins og Borgarahreyfingunni.