Kosið um framtíð Borgarahreyfingarinnar

Kosið verður um það í dag hvort Borgarahreyfingin verði áframhaldandi hreyfing eða hefðbundinn stjórnmálaflokkur á fyrsta landsfundi hreyfingarinnar á Grand hóteli. Hundrað manns sitja nú fundinn og fer stjórnarkjör fram síðdegis.

Borgarahreyfingin var stofnuð í vor og eru 650 skráðir félagar. Hreyfingin fékk fjóra þingmenn kjörna í síðustu kosningum. Undanfarið hafa miklar deilur verið innan flokksins um fólk og málefni og nýlega sagði Þráinn Bertelsson þingmaður hreyfingarinnar sig úr flokknum og starfar nú sem óháður þingmaður. Þá lét framkvæmdastjóri þingflokksins af störfum og formaður stjórnar Borgarhreyfingarinnar sagði skilið við hann.

Margrét Rósa Sigurðardóttir, stjórnarmaður, segir að kosið verði um tvær tillögur á landsfundinum í dag. Þær snúast um hvort Borgarahreyfingin eigi að verða hefðbundinn stjórnmálaflokkur sem bjóði fram í næstu sveitarstjórnarkosningum eða að Borgarahreyfingin verðir áfram hreyfing grasrótarinnar og vinni samkvæmt fyrirliggjandi stefnu.

Um 100 manns sitja nú fundinn en ný stjórn verður kjörin síðdegis. Framboðsfrestur rennur út klukkan þrjú.