Samfylkingarfólk skorar á menntamálaráðherra

Ungir jafnaðarmenn, ungliðahreyfing Samfylkingarinnar, krefjast þess að námslán fyrir næsta skólaár hækki. Þeir skora á Katrínu Jakobsdóttur, menntmálaráðherra, að staðfesta ekki þær úthlutunarreglur sem stjórn Lánasjóðs íslenskra námsmanna hefur samþykkt.

„Lánin eru lág fyrir og bólgnuðu ekki út í góðærinu. Núverandi námslánakerfi gerir að verkum að margir stúdentar hafa treyst á vinnu með skóla eða hjálp frá fjölskyldum til að eiga fyrir salti í grautinn. Á tímum atvinnuleysis er ekki lengur hægt að treysta á þennan stuðning," segir í ályktun ungra jafnaðarmanna.

Þar segir jafnframt að kjör stúdenta séu orðin það slæm að atvinnuleysisbætur séu mun vænlegri kostur en námslán. „Bæturnar eru meira en 50% hærri en lánin. Þegar lánin eru svo lág að ómögulegt er að lifa á þeim, hefur fólk ekki val um að stunda nám."

Ríkisstjórn Samfylkingarinnar og Vinstri Grænna má ekki vega að grunngildum jafnaðarmanna um jafnrétti til náms, að mati ungliðahreyfingarinnar.

„Efnahagur má ekki stjórna því hvort fólk hafi tækifæri til þess að feta menntaveginn,“ segir í ályktuninni. Þess vegna skora Ungir jafnaðarmenn á menntamálaráðherra að staðfesta ekki þær úthlutunarreglur sem stjórn LÍN hefur samþykkt.