Djassari handtekinn á Fríkirkjuvegi 11

Djassarinn Tómas R. Einarsson var handtekinn í Fríkirkjuvegi 11 í gærkvöldi þegar hópur hústökumanna sló eign sinni tímabundið á hús auðjöfursins Björgólfs Thors Björgólfssonar.

„Ef Íslendingar eiga að borga skuldir auðmannanna sem ráku banka í óstjórn þá ættum við að minnsta kosti eignast Fríkirkjuveg," segir mótmælandinn Tómas R. en hann segir að um þetta hafi hann deilt við tvær lögreglukonur sem voru honum ekki sammála.

„Ég var bara að kíkja á nýja húsið mitt," segir Tómas hlæjandi en lögreglukonunum var ekki jafn skemmt og djassgeggjaranum og því settur þær hann í handjárn og leiddu hann út úr nýja húsinu sínu.

„Þeim fannst ég svo líflegur að þær settu mig í handjárn," segir Tómas sem erfir ekki viðskipti sín við lögreglukonurnar.

Tómas segir að viðnám sitt hafi verið friðsamlegt og ekki hafi þurft að hafa hann í járnum nema í nokkrar mínútur. Þá hafi heldur ekki þurft að færa hann niður á lögreglustöð.

„Ég slapp við handtökur í þetta skiptið þannig ég get æft mig í dag," segir Tómas sem spilar á kontrabassa.

Sjálfur vill Tómas meina að það sé ótækt og óboðlegt að útrásavíkingarnir svokölluðu, skulu sitja uppi með sinn ránsfeng á meðan þjóðin borgar skuldir þeirra.

„Héðan í frá ættu eignir þeirra að verða að okkar eignum. Það er lágmarkskurteisi gagnvart þjóðinni," segir Tómas en Björgólfur Thor er sonur Björgólfs eldri og sem átti Landsbankann sem var með Icesave á sinni könnu.

Mótmælunum lauk svo á ellefta tímanum í gær. Að sögn Tómasar var tilgangur mótmælanna þá þegar kominn til skila.

Spurður hvort krepputalið hafi áhrif á suðrænan djassinn sem Tómas er þekktastur fyrir, segist Tómas ekki bera þess merki enn. Það verði þó að skoða einhvertímann í framtíðinni og þá af meiri fræðingum en honum sjálfum.

Hann segir þjóðina djassþyrsta þessa daganna, hljómsveit hans, Trúnó-bandið, hefur varla undan spilamennsku. Að auki hafi hljómsveitin ferðast vítt og breitt um landið, en síðast voru þeir í Vestmannaeyjum á Hvítasunnu. Síðan liggur leiðin til Ísafjarðar og þaðan á djasshátíð á Egilsstöðum.

„Það er ekkert kreppumerki í djassinum, við spilum óháð hagsveiflum," segir Tómas að lokum sem kom mótmælum sínum rækilega til skila í gær.