Genapróf verði fyrir alla

Innan fárra ára munu genapróf kosta milli eitt og tíu prósent af því sem þau kosta í dag, enda verða verkfærin sífellt ódýrari, sem þarf til að gera þau. Svo segir Kári Stefánsson, stofnandi Íslenskrar erfðagreiningar.

„Ég er sannfærður um að nær allir Vesturlandabúar muni fara í slík próf innan nokkurra ára,“ sagði hann í gær á alþjóðlegri líftækniráðstefnu IJP-samtakanna í Heidelberg í Þýskalandi.

Genapróf, eða arfgerðagreiningu, má kaupa á internetinu hjá nokkrum fyrirtækjum og kosta þau á bilinu 399 til þúsund Bandaríkjadali. Með þeim er svo reiknað út hversu líklegt er að hver og einn fái hina ýmsu sjúkdóma.

Spurður hvort þessi próf séu sambærileg, hvort sömu niðurstöðurnar kæmu út úr prófi til dæmis frá samkeppnisaðilanum Navigenics og úr prófi frá Íslenskri erfðagreiningu, segir Kári að arfgerðin sem greind er sé alltaf sú sama.

Hins vegar sé ákveðinn munur á aðferðafræði fyrirtækjanna, þegar þær túlki niðurstöðurnar. „Það er því rými fyrir hárfínan mun á þeim,“ segir hann. Sama megi segja um kólesterólpróf milli landa. Niðurstöðurnar yrðu ekki endilega nákvæmlega þær sömu.- kóþ