Mótmælt í Mývatnssveit

Mótmælafundur verðuk haldinn á Hallarflöt í Dimmuborgum í Mývatnssveit klukkan 15:00 í dag.

„Okkur, sem stöndum að mótmælum hér í Mývatnssveit finnst rétt að safnast saman enn á ný og láta af okkur vita. Þótt áfangasigrar hafi unnist er ekki öllum kröfum mótmælenda fullnægt.

Þar sem unnið er að stofnun nýrrar ríkisstjórnar og fleiri málum finnst okkur þó rétt að staldra við og sjá kverju fram vindur.

Þemað okkar þessu sinni er þess vegna að tendra vonarneista í eigin brjósti, kveikja á friðarkerti með þessum neista og senda von og frið til þjóðfélagsins alls.

Okkur finnst ekki minna um vert að hittast, sýna hvert öðru samhug og þjappa okkur saman fyrir komandi tíma. Það styrkir samfélagið allt," segir í tilkynningu frá aðstandendum mótmælanna.