Lítil stemning fyrir því að Davíð fari aftur í pólitík

Mikill meirihluti þjóðarinnar er andvígur því að Davíð Oddsson seðlabankastjóri snúi sér aftur að stjórnmálum. Fjórðungur kjósenda Sjálfstæðisflokksins er því hins vegar fylgjandi.

Könnunin var gerð fyrir fréttastofu Stöðvar 2 og Vísis á mánudag og var úrtakið tvö þúsund manns af öllu landinu. Átta hundruð svöruðu spurningunni: Viltu sjá Davíð Odddsson snúa aftur í pólitík?. Þegar þeir sem eru óákveðnir eða svara ekki eru taldir með vilja tíu prósent að Davíð snúi aftur í pólitíkina en 84 prósent eru því andvígir. Af þeim sem tóku afstöðu eru hins vegar 90 prósent á móti því að Davíð harsli sér völl í stjórnmálum á nýjan leik en tíu prósent eru því fylgjandi. Það er fróðlegt að skoða niðurstöðurnar eru skoðaðar með tilliti til þess stjórnmálaflokks sem fólk ætlar að kjósa.

Þrettán prósent stuðningsmanna Framsóknarflokksins vill að Davíð fari aftur í stjórnmálin, eingöngu fjögur prósent kjósenda Samfylkingarinnar vilja það, sex prósent þeirra sem ætla að kjósa Vinstri Græna geta hugsað sér að Davíð snúi sér aftur með formlegum hætti að stjórnmálunum og tuttugu og fimm prósent stuðningsmanna Sjálfstæðismanna vill sjá Davíð í pólitíkinni á nýjan leik, en sjötíu og fimm prósent stuðningsmanna flokksins í könnuninni eru á móti því.