Hafa áhyggjur af atgervisflótta flugumferðastjóra

Félag íslenskra flugumferðarstjóra lýsir áhyggjum af afleiðingum atgervisflótta sem sé brostinn á í atvinnugreininni.

Stjórn félagsins segir í yfirlýsingu til fjölmiðla að á skömmum tíma hafi 9 af alls 64 flugumferðarstjórum, sem starfi dagsdaglega við flugumferðarstjórn hérlendis, sagt upp störfum og haldið utan til starfa. Enn fleiri úr þessum hópi kanni málið eða hafi nú þegar sótt um starf við flugumferðarstjórn erlendis. Fastlega megi því gera ráð fyrir að enn fleiri flugumferðarstjórar flytjist af landi brott á næstu mánuðum.

Flugumferðastjórar segja að hæstlaunuðustu flugumferðarstjórarnir á Íslandi nái ekki byrjunarlaunum starfssystkina sinna annars staðar á Norðurlöndum. Þá séu dæmi um að íslenskir flugumferðarstjórar fjórfaldi útborguð laun sín með því að ráða sig í vinnu erlendis. Þeir segja að samhæfð menntun flugumferðarstjóra um allan heim auðveldi þeim að fá vinnu utan heimalandsins, jafnvel í öðrum heimshlutum. Íslensku flugumferðarstjórarnir, sem eru þegar farnir eða íhuga að fara, séu að jafnaði með tólf ára starfsaldur. Þeir séu því afar reyndir fagmenn og mjög eftirsóttir, enda skorti flugumferðarstjóra víða um heim.