Yfir 350 ræður haldnar í Icesave

Lokaspretturinn í annarri umræðu um Icesavefrumvarp ríkisstjórnarinnar hefst í hádeginu á Alþingi. Atkvæði verða greidd um frumvarpið á morgun. Haldnar hafa verið yfir 350 ræður og gerðar meira en 2.000 athugasemdir í málinu.

Samkomulag tókst á fundi Ástu Ragnheiðar Jóhannesdóttur forseta Alþingis með stjórnarandstöðunni á föstudag um lok annarrar umræðu Icesave frumvarps ríkisstjórnarinnar. Umræðan hefst að nýju klukkan hálf eitt í dag og stendur að minnsta kosti fram að þingflokksfundum sem hefjast klukkan tvö.

Eftir þingflokksfundina klukkan þrjú mælir Árni Páll Árnason félags- og tryggingamálaráðherra fyrir þremur frumvörpum þannig að þau komist til nefndar. Eftir það gæti icesaveumræðan hafist á nýjan leik og ef svo fer er ómögulegt að segja til um hvenær henni lýkur í dag eða kvöld. Hins vegar er samkomulag um að annarri umræðu ljúki í dag og atkvæðagreiðsla um málið fari fram í hádeginu á morgun. Að henni lokinni fer málið til fjárlaganefndar til lokaafgreiðslu.

Reikna má með að stjórnarandstaðan reyni að knýja á um að þar fari fram löng umræða um málið, en samkvæmt heimildum fréttastofunnar stefna stjórnarflokkarnir á að afgreiða málið endanlega í þriðju umræðu og atkvæðagreiðslu í þinginu fyrir jól. Samkvæmt starfsáætlun Alþingis átti þingið að fara í jólaleyfi hinn 17. desember en nú eru menn að gera sér vonir um að ljúka þingstörfum hinn 22. desember eða daginn fyrir Þorláksmessu.

Þingmenn hafa nú talað um Icesave í yfir 90 klukkustundir frá því málið kom aftur til kasta þingsins í haust, og eiga stjórnarandstöðuþingmenn heiðurinn af bróðurparti ræðutímans. Þeir hafa haldið 207 ræður og gert 1824 athugasemdir við ræður annarra. Stjórnarþingmenn hafa haldið 149 ræður og gert 238 athugasemdir í umræðunni.

Alls hafa því verið haldnar 356 ræður og gerðar 2.062 athugasemdir í umræðunni um Icesave það sem af er.