Indefence.is í breskar sögubækur

Landsbókasafn Bretlands - British Library - hefur ákveðið að varðveita vef indefence.is sem heimild um fjármálakreppuna fyrir fræðimenn framtíðar.

Í tilkynningu frá British Library segir að fjármálakreppan á Íslandi hafi svo víðtækar afleiðingar um allan heim að safninu finnist þvi beri skylda til að halda til haga upplýsingum af hinum nýju vefmiðlum vegna hennar. Safn British Library um fjármálakreppuna mun taka til um eitt hundrað vefja, og er vefur indefence.is einn þeirra.

Safnið er hluti af breska vefsafninu sem stofnað var árið 2004 í þeim tilgangi að varðveita vefheimildir um ókomna tíð.

Vefur Indefence hefur vakið heimsathygli og meðal annars verið vitnað til hans í umræðum í breska þinginu til marks um óánægju á Íslandi og annars staðar í heiminum með aðgerðir breskra stjórnvalda. Á vefnum er að finna ávarp til bresku þjóðarinnar þar sem beiting hryðjuverkalaga gegn íslensku bönkunum er gagnrýnd. Fleiri en áttatíu þúsund manns um allan heim hafa skrifað undir, þar á meðal er fjórðungur íslensku þjóðarinnar.