Móttökur hjá borginni fjórða hvern dag

Móttökur á vegum borgarstjórnar Reykjavíkurborgar hafa verið haldnar að meðaltali fjórða hvern dag undanfarin ár. Með móttökum er átt við öll mannamót sem haldin hafa verið á kostnað borgarstjórnar hvort sem um er að ræða móttökur með vínveitingum eða öðrum veitingum.

Skrifstofa borgarstjóra hefur tekið saman lista yfir þær móttökur sem haldnar hafa verið á vegum borgarstjórnar Reykjavíkur frá 1. janúar 2004 og fram til 15. febrúar 2009. Ekki er greint frá kostnaði við þær í samantektinni.

Á tímabilinu voru haldnar 463 móttökur sem þýðir að móttökur á vegum borgarstjórnar voru haldnar að jafnaði fjórða hvern dag.

Flestar móttökurnar fóru fram í Ráðhúsinu eða í Höfða. Þær hafa verið fyrir allt frá 15 til 500 manna hópa en meirihluti þeirra hefur þó verið fyrir 100 manns eða færri.

Árið 2004 voru 86 móttökur haldnar á vegum borgarstjórnar, 97 ári seinna og 103 móttökur voru haldnar bæði 2006 og 2007. Möttökunum fækkaði árið 2008 niður í 69. Það sem af er ári hafa fimm móttökur verið haldnar á vegum borgarstjórnar.