Segja Svandísi reyna að bregða fæti fyrir Orkuveituna

Guðlaugur G. Sverrisson, stjórnarformaður Orkuveitu Reykjavíkur, og Hjörleifur B. Kvaran, forstjóri fyrirtækisins, segja Svandís Svavarsdóttur, umhverfisráðherra, hafi ítrekað reynt að bregða fæti fyrir Orkuveituna. Þeir segja vanhugsaðar yfirlýsingar ráðamanna þjóðarinnar geta grafið undan þeim fyrirtækjum sem geri sitt besta til að efla trúverðugleika íslensks atvinnulífs erlendis.

Í Fréttablaðinu í dag segir Svandís fráleitt að láta sem úrskurður hennar um Suðvesturlínu standi álveri í Helguvík fyrir þrifum. Mun stærri ljón séu í veginum fyrir álversframkvæmdum en sá úrskurður. Til að mynda sé spurningum ósvarað um orkuöflun. Þá segir Svandís Orkuveituna mjög skuldsetta og fyrirtækið vera í járnum.

Guðlaugur og Hjörleifur segja aðstæður í íslensku efnahagslífi vera þannig að leitast hafi verið við að fá alla til að leggjast á árar og róa í sömu átt. Orkuveitan hafi tekið þátt í þeim róðri með því að leggja sitt af mörkum til uppbyggingar.

„Til þess hefur fyrirtækið meðal annars notið atbeina fjármálaráðherra í því skyni að tryggja afgreiðslu lánsins frá Evrópska fjárfestingabankanum. Í bréfi ráðherrans til bankans er lýst fullri trú á getu Orkuveitu Reykjavíkur til að standa við skuldbindingar sínar. Yfirlýsingar umhverfisráðherra eru því ekki aðeins í fullu ósamræmi við vilja ríkisstjórnarinnar samkvæmt Stöðugleikasáttmálanum heldur einnig við afstöðu fjármálaráðherra," segir í yfirlýsingu Guðlaugs og Hjörleifs.