Lostafullt athæfi og vefupptökur af 12 ára stúlkubarni

Karlmaður hefur verið dæmdur í þriggja mánaða fangelsi fyrir kynferðisbrot gegn stúlku sem þá var tólf ára.

Maðurinn var ákærður fyrir að strjúka stúlkunni innan klæða. Jafnframt að hafa sett sig í samband við hana á MSN-internetsamskiptum og hvatt hana með lostugum og ósiðlegum hætti til að sýna sig fyrir honum fáklædda og nakta að hluta í vefmyndavél. Einnig leitaðist hann við að hitta hana í kynferðislegum tilgangi.

Maðurinn neitaði fyrir dómi að hafa strokið stúlkunni. Hann játaði hins vegar MSN-samskiptin en kvaðst ekki hafa vitað um aldur stúlkunnar. Hann er ellefu árumn eldri en hún.

Stúlkan var haldin mikilli vanlíðan eftir athæfi mannsins. Í vottorði sálfræðings sem hún gekk til segir að hún hafi skömm á sér eftir það, sem meðal annars hafi leitt til þess að hún hafi skömm á líkama sínum. Komið hafi tímabil þar sem hún sé endalaust í sturtu og kasti upp mat.

Auk fangelsisrefsingarinnar var maðurinn dæmdur til að greiða stúlkunni 300 þúsund krónur í skaðabætur. Jafnframt þarf hann að greiða allan málskostnað, sem nemur ríflega hálfri milljón króna.- jss