Sprotafrumvarp loksins fyrir Alþingi

Fjármálaráðherra kynnti í gær stjórnarfrumvarp fyrir nýsköpunar- og sprotafyrirtæki. Gangi það í gegn geta fyrirtækin fengið fimmtung rannsókna- og þróunarkostnaðar endurgreiddan og fjárfestar fengið ívilnanir vegna kaupa á hlutafé.

„Þetta er æðislegt. Við höfum beðið eftir þessu í mörg, mörg ár,“ segir Hilmar V. Pétursson, forstjóri CCP, sem þróar og rekur fjölþátttökuleikinn EVE Online um stjórnarfrumvarp sem er á lokastigum hjá fjármála- og iðnaðarráðuneyti undir forystu forsætisráðuneytis. Það kann að verða lagt fyrir Alþingi á næstu dögum.

Frumvarpið er tvíþætt og kveður á um að nýsköpunar- og sprotafyrirtæki geta sótt um endurgreiðslu á allt að tuttugu prósentum af rannsókna- og þróunarkostnaði auk skattalegra ívilnana fyrir fjárfesta sem kaupa hlutabréf nýsköpunar- og sprotafyrirtækja.

Steingrímur J. Sigfússon fjármálaráðherra kynnti frumvarpið á fjárfestaþingi Seed Forum Iceland í gær. Það er sniðið að norskri fyrirmynd en varð þar að lögum fyrir um sjö árum. Álíka fyrirkomulag er þekkt víða um heim.

„Þetta eru bestu aðgerðirnar sem geta stutt við nýsköpun og komið okkur út úr kreppunni,“ segir Davíð Lúðvíksson hjá Samtökum iðnaðarins,

Davíð segir samtökin hafa kynnt leiðir sem þessar fyrir nokkrum árum en þær haft tilhneigingu til að daga uppi á borði fjármálaráðherra fyrri ríkisstjórnar þrátt fyrir að þær kunni að auka atvinnuþátttöku og skila hærri tekjuskatti í ríkiskassann.

Hann bendir á að Ísland hafi verið aftarlega á merinni í þessum málum og sé með frumvarpinu verið að jafna hlut íslenskra fyrirtækja, sem sum hver hafi flutt til útlanda í leit að betra umhverfi.

Skemmst er að minnast þess er Hilmar hjá CCP sagði, í samtali við tímaritið Tölvuheim árið 2005, fyrirtækið íhuga að flytja úr landi og fara þangað sem sambærilegar ívilnanir væru í boði og eru nú í smíðum hér. Ekkert varð úr flutningum.

jonab@frettabladid.is