Stjórnarkreppa gæti verið í uppsiglingu

Mikill titringur er innan ríkisstjórnarinnar vegna yfirlýsinga þingflokksformanns Vinstri grænna og Ögmundar Jónassonar í fjölmiðlum að undanförnu og óttast margir að stefni í stjórnarkreppu.

Andstaða margra þingmanna Vinstri grænna við að samið verði við Breta og Hollendinga um Icesave hefur ekki farið framhjá neinum. Í Silfri Egils í Ríkissjónvarpinu í dag sagði Guðfríður Lilja Grétarsdóttir þingflokksformaður að mikil eftirsjá væri í Ögmundi Jónassyni í stól heilbrigðisráðherra. Hann hefði staðið fyrir lýðræðislegum vinnubrögðum varðandi Icesave en almennt mætti ríkisstjórnin taka sig á í slíkum vinnubrögðum. það ætti að gera allt til þess að fá Ögmund aftur inn í ríkisstjórnina.

Forsætisráðherra hefur sagt að ríkisstjórnin treysti sér ekki til að leggja fram hugsanlegar breytingar á Icesave fyrir Alþingi í þeim búningi sem málið er nú. En ljóst sé að það þurfi að lokum að koma aftur til kasta þingsins og þá þannig að ríkisstjórnin geti treyst á meirihluta sinn á Alþingi.

Þingflokkur Vinstri grænna er hins vegar nánast klofinn í málinu, hvernig sem það kæmi aftur til þings. Þingmennirnir Atli Gíslason, Ásmundur Einar Daðason og Lilja Mósesdóttir hafa haft miklar efasemdir varðandi Icesave. Forystumenn ríkisstjórnarinnar hafa hins vegar ítrekað að efnahagsáætlun hennar hvíli á því að einhvers konar samkomulag náist um Icesave, svo aðrir þættir efnahagsviðreisnarinnar geti haldið áfram. Ef stjórnin getur ekki treyst á þingflokka sína, er hins vegar mikill möguleiki á því að stjórnarkreppa verði í landinu, þar sem erfitt er að sjá annað starfhæft stjórnarmynstur í spilunum