Reykkafarar fóru inn í hús í Neskaupstað

Reykkafarar úr slökkviliði Fjarðarbyggðar fóru inn í tvíbýlishús að Hlíðargötu í Neskaupsstað í dag, þar sem eldur logaði.

Það var um hálffimmleytið sem slökkvilið Fjarðabyggðar var kallað út en þá hafði orðið vart við mikinn reyk á efri hæð í tveggja hæða tvíbýlishúsi í götunni. Reykkafararnir fóru inn í húsið til leitar og slökktu eld við eldavél og í eldhúsinnréttingu. Neðri hæð hússins var strax rýmd. Einn íbúi var fluttur á Fjórðungssjúkrahúsið í Neskaupstað vegna gruns um reykeitrun.

Samkvæmt upplýsingum frá slökkviliði Fjarðarbyggðar urðu skemmdir vegna elds við eldavél og í eldhúsinnréttingu. Hiti og reykur barst upp í þakrými um viftustokk auk þess sem sót barst um alla íbúðina. Hratt og vel gekk að ráða niðurlögum eldsins og reykræsta íbúðina.