Ásta baðst afsökunar

„Þegar litið er um öxl getur engum dulist að Sjálfstæðisflokkurinn og þingmenn hans hefðu getað gert betur á síðustu árum. Ég á minn þátt í því andvaraleysi sem þingmenn þjóðarinnar hafa gert sig seka um á undanförnum mánuðum, misserum og jafnvel árum gagnvart þróun efnahagsmála í landinu og því hruni sem lengi var í uppsiglingu og varð að veruleika í októberbyrjun," sagði Ásta Möller þingkona við opnun kosningaskrifstofu sinnar í dag. Ásta asgði að eftir á að hyggja væri ljóst að þingmenn, embættismenn, fréttamenn, hagfræðingar og aðrir hafi sofið á verðinum. „Mér þykir miður að vera ein þeirra sem hefði átt að vaka betur og biðst afsökunar á mínum þætti málsins," sagði Ásta.

„Um leið má ef til vill spyrja um leið og ég viðurkenni mistök hvort ég sé þá ekki vanhæf til áframhaldandi starfa. Svar mitt er hiklaust neitandi. Það að horfast í augu við veruleikann, viðurkenna mistök sín, biðjast afsökunar og reyna að læra af reynslunni gerir fólk ekki vanhæft heldur oft á tíðum þvert á móti að mínu mati," sagði Ásta. Hún sagði að sér finndist samt krafa fólks um endurnýjun vera eðlileg og margir af þeim sem voru í fremstu víglínu hafi nú stigið til hliðar, bæði þingmenn og embættismenn. Það sé samt vafalaust enginn að óska sér þess að til dæmis þingmenn, sem að hennar mati beri allir ákveðna ábyrgð hvar í flokki sem þeir standi, myndu allir sem einn víkja sæti vegna kröfu um endurnýjun. „Það yrði þjóðinni áreiðanlega ekki til góðs," sagði Ásta.