Gúggla verður að glöggva og Facebook verður vinabók

Málfræðingurinn Baldur Jónsson, sem situr í tölvuorðanefnd, hefur lagt til íslenskar þýðingar á orðunum Facebook, sem þúsundir Íslendinga nota, og einnig orðinu að gúggla, sem er dregið af leitar síðunni Google. Í grein sem Baldur skrifar í Morgunblaðið í dag leggur hann, og tölvuorðanefndin til, að íslenska þýðingin á Facebook, verði vinabók.

Það er þá dregið af Ölerindum Hallgríms Péturssonar, þó það séu tvö orð í vísunni, það er að segja, vina mót. Þá leggur Baldur einnig til að sögnin að „gúggla," verði breytt í sögnina að „glöggva". Samanber þá að glöggva sig á einhverju. Baldur tekur fram í greininni að um hugmyndir sé að ræða, og verði hugsanlega eingöngu til þess að aðrar og betri tillögur líti dagsins ljós.