Djammstöðum fjölgar enn

Skemmtistaðir virðast þrífast vel í kreppunni því opnaðir verða þrír nýir skemmtistaðir nú á næstunni.

Svo virðist sem Íslendingar ætli sér að dansa burt allar kreppu­áhyggjur sínar ef dæma má allan þann fjölda skemmtistaða sem eru að fara að hefja rekstur í miðbæ Reykjavíkur. Fyrir skemmstu voru opnaðir skemmtistaðirnir Karamba og Barbara við Laugaveg 22. Rokkbúllan Sódóma Reykjavík leit dagsins ljós í byrjun mars og þykir öflugur tónleikastaður. Innan skamms mun enn bætast í litríka flóru skemmtistaða bæjarins því þrír nýir staðir verða enn opnaðir í sumar.

Skemmti- og veitingastaðurinn Austur verður opnaður við Austurstræti 7 í byrjun júlí, en hönnuðurinn Hrafnhildur Hólmgeirsdóttir og hárgúrúinn Jón Atli Helgason sjá um að innrétta staðinn. Þess má geta að Hrafnhildur sá meðal annars um að innrétta skemmtistaðinn Bost­on sem þykir sérstaklega smekklegur.

Bakkus er nafnið á nýjum bar sem einnig er fyrirhugað að opna um miðjan júlí. Barinn verður til húsa við Tryggvagötu 22, þar sem Gaukur á Stöng var áður. Þar eru nú fyrir Sódóma Reykjavík og London Reykjavík. Alls verða því þrír skemmtistaðir í húsinu.

„Þetta verður hálfgerð listabúlla,“ segir Jón Pálmar Sigurðsson, einn þriggja eigenda staðarins.

„Við ætlum að leggja áherslu á góða tónlist en ætlum ekki að vera með plötusnúða til að byrja með. Svo ætlum við að halda listasýningar hérna af og til.“ Á staðnum verður einnig boðið upp á gott úrval af vodka sem verður sérpantað fyrir staðinn. Aðspurður segir Jón Pálmar að kreppan sé honum ekki mikið áhyggjuefni.

„Ég held að mér hafi boðist þetta tækifæri einmitt vegna kreppunnar. Ég hefði aldrei haft efni á því að opna bar í góðærinu.“

Tónleikastaðnum Organ á að skipta í tvo minni skemmtistaði og verður áfram tónleikastaður á efri hæðinni en í kjallara hússins verður diskótek. Gunnar Már Þráinsson, eigandi staðanna, segir að til að byrja með verði aðeins opið um helgar.

„Staðurinn í kjallaranum hefur hlotið nafnið Kjallarinn og þar verðum við með plötusnúða um helgar sem mun leika fyrir dansi. Við ætlum líka að bjóða gestum okkar upp á gott úrval af hanastélum og um leið reyna að stilla verðinu í hóf,“ segir Gunnar Már. Ætlunin er að opna báða staðina í byrjun júlí.

Einnig er fyrirhugað að opna tónleikastað við Klapparstíg 30, þar sem skemmtistaðurinn Sirkus var áður til húsa. Staðurinn mun heita Polar-bar. Eigandinn Loftur Loftsson sagði við Morgunblaðið fyrir skemmstu að staðurinn yrði opnaður 1. júlí. Hann vildi ekki tjá sig frekar við Fréttablaðið.

sara@frettabladid.is