Nína doktor

Nína Margrét Grímsdóttir píanóleikari varði hinn 2. júní sl. doktorsritgerð sína við tónlistardeild Graduate Center of the City University of New York. Andmælandi var dr. Sylvia Kahan, prófessor í píanóleik og tónlistarfræðum við CUNY Graduate Center og College of Staten Island. Titill doktorsritgerðarinnar er: „The Piano Works of Páll Ísólfsson (1893-1974) – A Diverse Collection.“

Ritgerðin birtir frumrannsóknir á píanóverkum Páls Ísólfssonar frá tónlistarfræðilegu- og tónlistarsögulegu sjónarmiði, þ.m.t. frumbirtingar átta handrita auk handritsútgáfu Tilbrigða um sönglag eftir Ísólf Pálsson. Ritgerðinni fylgir geisladiskur með píanóverkum Páls Ísólfssonar sem Nína Margrét hljóðritaði fyrir BIS Records í Svíþjóð árið 2001 og tilnefndur var til Íslensku tónlistarverðlaunanna sama ár.

Nína Margrét starfar við píanóleik og kennir við Listaháskóla Íslands og Tónlistarskólann í Reykjavík. Hún er gift Styrkári Hendrikssyni, forstöðumanni markaðsviðskipta hjá MP Banka, og eiga þau einn son, Kjartan Örn.