Fyrning þýðir gjaldþrot

Formaður sjávarútvegsnefndar segir ekki koma til greina að fara fyrningarleið í sjávarútvegi ef það sannast að hún hafi neikvæð áhrif á byggðirnar í landinu. Hann segir að sátt verði að ríkja um málið svo það fái framgang.

Þetta var meðal þess sem kom fram á málþingi um auðlindastýringu og fyrningarleið ríkisstjórnarinnar sem haldið var í Vestmannaeyjum í gær.

Atli Gíslason, þingmaður Vinstri grænna og formaður sjávarútvegsnefndar, sat málþingið í fjarveru flokksbróður síns, Jóns Bjarnasonar sjávarútvegsráðherra. Hann sagði að vandi sjávarútvegs væri stærri og meiri en hugmyndin um innköllun kvóta og endurúthlutun.

„Þar á ég við framsalið, skuldsetningu greinarinnar og Evrópusambands­aðild.“ Hann sagði jafnframt að fyrningarleið yrði ekki farin ef sýnt yrði fram á það að leiðin gengi gegn því markmiði að efla atvinnu og byggð í landinu. „Ég mun ekki fara leið sem kollvarpar sjávarútvegi.“

Þorvarður Gunnarsson, framkvæmdastjóri endurskoðunarfyrirtækisins Deloitte, greindi frá útreikningum sínum um þýðingu fyrningarleiðarinnar á fyrirtæki í rekstri. Niðurstaða hans er að vegna skuldsetningar eigi þau erfitt með að keppa um heimildir sem fyrnast og verða endurseldar.

„Ef fyrirtækin ná ekki að leigja til sín allt sem verður fyrnt frá þeim, þá munu þau fara í greiðsluþrot á örfáum árum. Kostnaðurinn við að umbylta kerfinu með þessum hætti er sá að skuldir þessara fyrirtækja falla á bankana og ríkið þarf að endurfjármagna bankana upp á nýtt. Mér sýnist að ávinningur ríkisins verði óverulegur og því sé þessi leið allt of dýr til að umbylta sjávarútvegi með þessum hætti“, segir Þorvarður.

Þórólfur Matthíasson, prófessor við Háskóla Íslands, sagði fyrningu draga úr yfirfjárbindingu í sjávarútvegi og minnki því vaxtagreiðslur fyrirtækja. „Í staðinn fyrir að greiða útlendingum vexti þá renna þessir fjármunir í ríkissjóð og minnka þar með skattheimtuþörf hins opinbera.“

Ólína Þorvarðardóttir, þingmaður Samfylkingar, sagði málflutning á þinginu einhliða gegn fyrningarleiðinni og gagnrýndi val framsögumanna.

Hún sagði málþingið „messu“ gegn fyrningu sem næði ekki til sjónarmiða og hagsmuna nema hluta þjóðarinnar. Hún minnti á af hverju leiðin væri íhuguð; flótti útgerðarmanna með milljarða út úr greininni og byggðir í sárum þess vegna.

svavar@frettabladid.is