Fimm sinnum fleiri makaskiptasamningar

Makaskiptasamingar á fasteignamarkaði eru fimm sinnum fleiri nú en fyrir ári síðan. Íbúðarverð hefur lækkað að meðaltali um 12,2% á síðustu tólf mánuðum.

Með makaskiptasamningum er átt við kaupsamninga um fasteign þar sem hluti kaupverðs er greiddur með annarri fasteign. Fram kemur á vef fasteignamats ríkisins að í apríl í fyrra voru gerðir 11 makaskiptasamingar með fasteignir á höfuðborgarsvæðinu. Í síðasta mánuði voru samningarnir hins vegar 56 talsins og hafa því fimmfaldast á milli ára.

Fjölgun makaskiptasaminga þykir til marks um þá erfiðu stöðu sem nú ríkir á fasteignamarkaði. Markaðurinn er meira og minna frosinn og seljendur neyðast oft til að selja undir markaðsvirði eigna.

Í nýútkominni samantekt Hagstofunnar kemur fram að íbúðaverð byrjaði að lækka um mitt síðasta ár. Í síðasta mánuði hafði íbúðarverð lækkað um 12,2% miðað við aprílmánuð í fyrra.

Seðlabankinn spáir því að íbúðarverð muni halda áfram að lækka á næstu árum eða um allt að 32 prósent að nafnvirði. Að raunvirði muni íbúðaverð lækka um 56% á næstu þremur árum.

Fram kemur á vef Hagstofunnar að makaskiptasamningar lækka skráð verðmæti fasteigna. Hefðu makaskiptasamningar þannig verið undanskildir frá upphafi síðasta árs í útreikningum Hagstofunnar á vísitölu fasteignaverðs hefði hún verið 2,9% hærri í apríl en ella.